DÍA DAS LETRAS GALEGAS. 2014
X. M. DÍAZ CASTRO
Un paso
adiante i outro atrás, Galiza,i a tea dos teus sonos non se move.
A espranza nos teus ollos se esperguiza.
Aran os bois e chove.
Un bruar de navíos moi lonxanos
che estrolla o sono mól coma unha uva.
Pro tí envólveste en sabas de mil anos,
i en sonos volves a escoitar a chuva.
Traguerán os camiños algún día
a xente que levaron. Deus é o mesmo.
Suco vai, suco vén, Xesús María!,
e toda a cousa ha de pagar seu desmo.
Desorballando os prados coma sono,
o Tempo vai de Parga a Pastoriza.
Vaise enterrando, suco a suco, o Outono.
Un paso adiante i outro atrás, Galiza! DÍAZ CASTRO, José María, Nimbos, Vigo, Editorial Galaxia, 1961.
Se lle rende tributo nas Letras
Galegas 2014, ano no que se conmemora o centenario do seu nacemento. Xosé
María Díaz Castro naceu o 19 de febreiro do 1914 no Vilariño, lugar de San
Vicente dos Vilares, Concello de Guitiriz, Lugo. Seus pais, Isidro Díaz e María
Castro, labregos, tiveron catro fillos: Antonio, María, Xosé María e Serafín.
Na escola da súa parroquia aprendeu as primeiras letras. Aos dezaseis anos
estreouse cun poema en castelán na revista Lluvia de rosas de Tarragona,
na que seguiría colaborando moi esporadicamente. En 1929 ingresa no Seminario
de Mondoñedo, onde cursa tres anos de Latín e Humanidades, outros tres de
Filosofía e dous de Teoloxía. É alí onde confirma a súa vocación de escritor.
http://www.poetadiazcastro.com/
http://centros.edu.xunta.es/ceipcondesadefenosa/bibliocondesa/proxectos/diaz_castro/diaz_castro.html
http://centros.edu.xunta.es/ceipcondesadefenosa/bibliocondesa/proxectos/diaz_castro/diaz_castro.html
Ningún comentario:
Publicar un comentario