Libros, documentais, cómics e rutas lembrarán a Díaz Castro

O Día das Letras Galegas coincide co centenario do nacemento do poeta

O 2014 está a ser e será un ano de ampla actividade en Guitiriz coa poesía de Xosé María Díaz Castro como eixe común. A coincidencia do Día das Letras Galegas co centenario do seu nacemento, do que se cumprirá a data exacta o vindeiro 19 de febreiro, ten servido de estímulo para que centros de ensino, asociacións e o Concello traballen arreo para que o autor de Nimbos sexa lembrado no seu concello natal con intensidade e agarimo.

O instituto da vila, que leva o nome do poeta, xa ten contribuído a espallar o nome de Xosé María Díaz Castro coa edición do documental A lus do mundo. Está dirixido por Cristina de la Torre, pero conta ademais cunha clara pegada do centro: por exemplo, a profesora Sandra Tenreiro puxo a música e o alumno David Gómez adaptou algún poema.

O documental xa se presentou na Coruña e en Lugo, pero a directora do instituto, Olga Aguiar, explica que tamén se tenta que xente de fóra se achegue a Guitiriz atraída por Díaz Castro. Para acadar ese obxectivo, engade, prevese deseñar unha ruta baseada en lugares vencellados coa vida e coa obra do poeta, nado na parroquia dos Vilares e enterrado no cemiterio da capital do concello.

A intención está clara: «Que os alumnos se sintan protagonistas», resume Aguiar, quen ademais subliña que os rapaces poden decatarse de que Díaz Castro «fala o galego que falan eles». O centro ten deseñado axendas co gallo deste ano tan especial, e xa se repartiron en colexios do concello e de Aranga (A Coruña). 

 http://www.lavozdegalicia.es/noticia/ocioycultura/2014/01/13/libros-documentais-comics-rutas-lembraran-diaz-castro/0003_201401G13P27991.htm